НҰР-СҰЛТАН, 25 қаңтар – Sputnik. 26 қаңтарда президент Қасым-Жомарт Тоқаевтың төрағалығымен үкіметтің кеңейтілген отырысы өтеді.
Бұл туралы мемлекет басшысының баспасөз хатшысы Берік Уәли Facebook-те жазды.
"Ертең, яғни 26 қаңтарда, мемлекет басшысы Қасым-Жомарт Тоқаевтың төрағалығымен үкіметтің кеңейтілген құрамдағы отырысы өтеді. Онлайн форматта өтетін жиында елдің әлеуметтік-экономикалық дамуының 2020 жылғы қорытындылары мен алдағы жоспары талқыланбақ", - деді ол.
БАҚ өкілдері іс-шараны "Қазмедиа орталығынан" дер кезінде таратуға мүмкіндік алады.
Еске салсақ, парламент сайлауынан кейін 18 қаңтарда Қазақстан үкіметінің жаңа құрамы бекітілді.
Премьер-министр мен министрлердің басым бөлігі өз орнын сақтап қалды. Екі министр ғана ауысты. Еңбек және халықты әлеуметтік қорғау министрлігіне Серік Шәпкенов келсе, ұлттық экономика министрлігін Әсет Ерғалиев басқарды.
Сондай-ақ, сыртқы істер министрі Мұхтар Тілеуберді төртінші вице-премьер қызметін қоса атқарады.
