НҰР-СҰЛТАН, 28 қараша — Sputnik. Алматы облысы Талғар ауданының әкімдігі төрт жасар бала өлімінің мән-жайын айтты.
Әкімдіктің хабарлауынша, қайғылы оқиға "Талғар-Нұрәлі" жауапкершілігі шектеулі серіктестігінің "Бүлдіршін" балабақшасында болған.
"Балабақша қызметкерлерінің айтуынша, 26 қараша сағат 15.20 шамасында бала түскі ұйқыдан оянбаған. Олар жедел жәрдем шақырып, қыздың ата-анасына хабарын берген", - дейді әкімдіктегілер.
Балабақшаға дереу дәрігерлер бригадасы жеткен.
"Алдын ала мәлімет бойынша баланың тамағынан қатты зат табылған. Қылмыстық іс қозғалды, тергеу жүріп жатыр", - деп жазылған хабарламада.
Оқиға орнына аудан әкімінің орынбасары мен білім бөлімінің жетекшісі барады.
Әкімдіктің мәліметіне сүйенсек, "Бүлдіршін" балабақшасы 2015 жылдан бері жұмыс істейді. Көз жұмған қыз өткен жылдың 8 қарашасынан балабақшаға барып жүрген.
Бұған дейін Алматы облысының полиция департаменті 26 қарашада Талғар қаласындағы балабақшалардың бірінде кішкентай қыздың көз жұмғанын хабарлады. Аталған факті бойынша қылмыстық іс қозғалған.
"Сот-медициналық сараптама кезінде қыздың тамағынан қатты пластмасса зат табылды. "Балалардың өмірі мен денсаулығы қауіпсіздігін қамтамасыз ету жөніндегі міндеттерді тиісті деңгейде орындамау" бабы бойынша сотқа дейінгі тергеу жүргізіліп жатыр", - деп түсіндірді полицейлер.
Баланың өлiмiне кiнәлiлер бес жылға бас бостандығынан шектелуі немесе айырылуы мүмкін.
