НҰР-СҰЛТАН, 15 қазан – Sputnik. Солтүстік Қазақстан облысында 17 жастағы жасөспірім алаңқай жерден граната тауып алды, деп хабарлайды Polisia.kz.
Қызылжар ауданындағы ауылдардың бірінің 17 жастағы тұрғыны алаңқайдан гранатаға ұқсас затты анықтаған. Бала оны тәтесінің үйіне әкелген, ал ол полицияға хабарлаған.
Соколов поселкелік полиция бөлімшесінің қызметкерлері оқиға орнын қоршауға алып, жақын маңдағы үш үйдің жеті тұрғынын қауіпсіз жерге көшірді. Мамандар қауіпті затты арнайы қалыпқа салды. Табылған зат "УЗРГМ" тұтандырғышы бар "РГД" гранатасы болып шықты.
"Зат сараптамаға жіберілді, кейін арнайы жағдайларда жойылады, – деп хабарлады Қызылжар ауданы ПБ бастығының міндетін атқарушы Нұрлыжан Ақтанов.
Ол жарылғыш зат табылған жағдайда өздігінен жарылып кетпеу үшін оларды көшіруге, орнын ауыстыруға болмайтынын еске салды.