НҰР-СҰЛТАН, 7 қазан – Sputnik. Елорданың аппеляциялық соты LRT ісі бойынша тергеу шараларын қайта бастауға үкім шығарды, деп хабарлайды Sputnik Қазақстан тілшісі.
Бұған дейін сотталған адамдар аштық жариялап, апелляциялық сатыдағы отырысқа қатысуға мүмкіндік беруді талап еткен.
Бүгін судья Абай Көкжалов сот алқасының шешімін жариялады.
"Сот алқасы Аманжолов, Нұрпейісов, Әшім, Ачилов, Қасабаева, Мусенова мен Әбдіхамитоваға қатысты қылмыстық істер бойынша мамандырылған ауданаралық сотының 2021 жылғы 28 мамырдағы үкімін жоюға үкім шығарды. Қылмыстық іс басты сот талқылауын белгілеуге кедергі болатын маңызды тәртіп бұзушылықтарды жою үшін Нұр-Сұлтанның прокурорына қайтарылсын", - деді Көкжалов.
Сот шешіміне сәйкес, сотталушылары қамауда отыра береді.
Астана LRT соты
LRT құрылысына бөлінген қаржыны жымқыру ісі бойынша алғашқы сот отырысы 2020 жылы 29 қазанда өтті. Жеті адам 5,8 миллиард теңгені жымқырғаны үшін айыпталды.
Ал елорда әкімінің бұрынғы орынбасары Қанат Сұлтанбеков пен "Астана LRT" ЖШС бұрынғы басшысы Талғат Ардан халықаралық іздеуде жүр. Жақында жемқорлықпен күрес қызметі Талғат Арданның қай елде тығылып жатқанын білеміз деп мәлімдеді. Қанат Сұлтанбеков болса АҚШ-та жүр.
Тергеу материалдарына сәйкес, Сұлтанбеков пен Ардан қылмыстық топ құрып, LRT құрылысына кететін шығындарды 24 миллиард теңгеге артық көрсеткен. Осы қылмысқа әкімдіктің басқарма басшылары, сондай-ақ шетелдік және отандық компаниялардың өкілдері қатысқан. Қылмыстық топ бюджетке 5 миллиард 800 миллион теңгеден астам шығын келтірді
Сот үкімі
28 мамырда LRT құрылысына бөлінген қаржыны жымқыру ісі бойынша сот үкімі шығарылды. Қылмыстық іс елорданың қылмыстық істер жөніндегі мамандандырылған ауданаралық сотында қаралды.
Сот үкіміне сәйкес, жолаушылар көлігі және автомобиль жолдары басқармасының бұрынғы басшысы Рашид Аманжолов 10 жылға, қалалық мәслихаттың бұрынғы хатшысы және депутаты Жанат Нұрпейісов, "НұрТрейд" ЖШС ("Астана LRT"-ның қосалқы мердігері) бұрынғы директоры Улугбек Ачилов, мердігердің өкілдері Тимур Қасабаев, Дәурен Әбдіхамитов 8 жылға сотталды.
Ал "Astana Innovations" АҚ экс-басқарма төрағасы Талғат Әшім мен мердігердің тағы бір өкілі Дулат Мусенов 7 жылға бас бостандығынан айырылды.
Тасмағамбетов пен Исекешев сотқа келсін!
8 қыркүйекте өткен апелляциялық сот отырысында адвокаттар бірқатар жоғары лауазымды шенеунікті куәгер ретінде шақыруды сұрады.
Рашид Аманжоловтың адвокаты Сәуле Ақатованың айтуынша, істің мән-жайын анықтау мақсатында аппеляциялық сотқа президент көмекшісі, қауіпсіздік кеңесінің хатшысы Әсет Исекешев, Алматы әкімі Бақытжан Сағынтаев, ұлттық банк төрағасы Ерболат Досаев пен Қазақстанның Ресейдегі бұрынғы елшісі Иманғали Тасмағамбетовты шақыру қажет.
Олар сан алуан қарама-қайшылықтарды жоюға және шындықты білуге көмектесе алады. Өйткені барлығы LRT құрылысы кезінде жауапты қызметте болған.
"Біз сотқа бұрынғы премьер-министр Серік Ахметовты, премьер-министрдің бірінші орынбасары (қазір Алматы әкімі) Бақытжан Сағынтаевты, индустрия және жаңа технологиялар министрі (қазір президент көмекшісі) Әсет Исекешевті шақырып, онлайн режимде жауап алуды сұраймыз. Оларға өздері қол қойған құжаттарды да көрсету керек. Сосын ол құжаттардың маңыздылығын, төмен тұрған мемлекеттік құрылымдар мен лауазымды тұлағалардың атқарған міндеттері жайында сұрау қажет", – деді Ақатова.
Оның айтуынша, LRT құрылысы бойынша шешім қабылдаған адамдар осы жобаның мемлекет үшін несімен тиімді болғанын түсіндіріп беруге тиіс.
Сондай-ақ Ақатова сотқа Қазақстанның Нидерланд Корольдігіндегі қазіргі елшісі Асқар Жұмағалиевты, әлеуметтік медициналық сақтандыру қоры директорлар кеңесінің төрағасы Болат Жәмішевті және Тұңғыш президент әкімшілігінің экс-басшысы Әділбек Жақсыбековты шақыру қажет деп санайды.
Атышулы LRT
2013 жылы Қазақстанның тұңғыш президенті Нұрсұлтан Назарбаев LRT құрылысы тым қымбатқа түсетінін мәлімдеді. Бірнеше жылдан кейін қытайлық инвесторлар келді. Ал 2019 жылы шілде айында Қасым-Жомарт Тоқаев жеңіл рельсті көлік құрылысын сынға алып, осы жобаның тиімділігіне сенбейтінін айтты.
LRT-ның құрылысы 2019 жылдың соңында аяқталады деген жоспар болған. Алайда қытайлық инвесторлар қаржыландыруды тоқтатты. Артынан "Астана банкінде" тағы 200 миллион доллардың бұғатталып қалғаны туралы ақпарат тарады. Биыл наурыз айында Есеп комитеті бұл жоба өзін ақтамайтынын мәлімдеді.
Ал маусым айында елорда әкімі Алтай Көлгінов LRT құрылысының қайта жанданғанын мәлімдеді. LRT-ны толығымен аяқтау үшін қосымша 1 миллиард доллар қажет.
Оқи отырыңыз:
- Бюджеттің 6 миллиард теңгеге жуық қаржысын талан-таражға салғандарға тықыр таянды
- Нұр-Сұлтанда LRT құрылысына қатысты тағы шу шықты
- Қаржы министрі "ЛРТ" құрылысына қосымша қаржы қайдан тартылатынын айтты
