НҰР-СҰЛТАН, 17 мамыр — Sputnik. Алматы облысында жантүршігерлік жол апаты болды. Mazda-626 екі жүк көлігінің арасында мыжылып қалды, деп хабарлайды Sputnik Қазақстан.
Әлеуметтік желіде жол апатының видеосы тарап кетті. Одан қызыл түсті жеңіл автокөліктің екі жүк көлігінің арасында мыжылып қалғанын анық көруге болады.
Посмотреть эту публикацию в Instagram
Ресми мәліметке сәйкес, жол апаты бүгін сағат 10:00-де Алматы облысындағы Көкөзек ауылына жақын жерде "Жібек жолы – Елтай – Боралдай" тасжолында болған.
"Алдын ала мәліметке сәйкес, HUALING жүк көлігінің жүргізушісі кептеліс кезінде қашықтықты сақтамай, Mazda-626-ны соққан. Одан кейін жеңіл көлік инерциямен алдында тұрған VOLVO жүк көлігіне соғылған", - деді облыстық полиция департаментінің қызметкерлері.
Жол апатынан жеңіл көліктің жүргізушісі зардап шекті. Оны дереу ауруханаға жеткізген. Қазіргі кезде сотқа дейінгі тергеу шаралары басталды.
