НҰР-СҰЛТАН, 27 қараша – Sputnik. Талдықорғанда газ баллонның жарылуы салдарынан жеке тұрғын үй қирап қалды. Sputnik Қазақстанға бұл туралы төтенше жағдайлар министрлігінің ресми өкілі Талғат Уәли хабарлады.
Оқиға орнынан 8 адам ауруханаға жеткізілді, оның үшеуі балалар.
26 қараша күні сағат 20:00 шамасында Алматы облысы төтенше жағдайлар департаментінің кезекші бөліміне Талдықорған қаласының іргесіндегі Еркін ауылында жеке тұрғын үйде сыйымдылығы 5 литрлік газ баллоны жарылғаны туралы хабар түскен.
Жарылыс салдарынан өрт шыққан жоқ. Алайда тұрғын үйдің қабырғалары мен шатыры қирады.
"Жарылыс салдарынан 8 адам зардап шекті. Оның үшеуі балалар. Олардың барлығы медициналық мекемелерге жеткізілді", – деді Талғат Уәли.
Алдын ала болжам бойынша, тұрмыстық газ баллонын жылыту үшін пештің жанына қою жарылысқа себеп болған.
Оқиға орнында Алматы облысы төтенше жағдайлар департаментінің мамандары мен техникалық құралдары, 8 жедел жәрдем бригадасы, полиция, газ қызметі мен жергілікті атқарушы органдардың өкілдері жұмыс істеді.
Сондай-ақ зардап шеккендердің туыстарына психологиялық көмек көрсету үшін психолог мамандар да оқиға орнына шақыртылды.
Оқи отырыңыз: Нұр-Сұлтандағы жарылыс: жансақтау бөлімінде тағы бір адам көз жұмды
Айта кетейік, 21 қарашада ел астанасы Нұр-Сұлтандағы кафеде газ баллон жарылды. 52 жастағы ыдыс жуушы оқиға орнында қайтыс болып, 23 адам жарақат алды. Бірнеше күннен кейін 24 жастағы қызметкер жансақтау бөлімінде көз жұмды.
