НҰР-СҰЛТАН, 13 қыркүйек — Sputnik. Алматыдағы митинг кезінде қоғамдық тәртіп бұзылған жоқ, деп хабарлады полиция департаментінің баспасөз қызметі.
"Жергілікті атқарушы орган рұқсат еткен митинг штаттық режимде өтті. Тәртіпбұзушылық болған жоқ. Шараға жүзге жуық адам қатысты", - деп жазылған хабарламада.
Митинг кезінде Шевченко көшесінде (Пушкин және Қонаев көшелері аралығы) көлік қозғалысы тоқтады.
"Митингіге қатысушылар Қазақстан заңнамасын сақтады", - деді полицияда.
Еске сала кетсек, Алматыда карантин басталғалы алғаш рет рұқсат етілген митинг 13 қыркүйек күні өтті. Бейбіт жиынды өткізу мерзімі – 11.00-ден 14.00-ге дейін болды.
Белсенділер Шоқан Уәлиханов атындағы скверге жиналды. Олар кредиттік амнистия мен шетелдіктерге жерді жалға беруге тыйым салуды талап етті. Сондай-ақ, плакаттарда "саяси тұтқындарды босату туралы" талап та болды.
Тағы оқыңыз: Қазақстандықтар митинг өткізу үшін не істеуі керек