НҰР-СҰЛТАН, 17 тамыз – Sputnik. Мемлекет басшысы Қасым-Жомарт Тоқаев қазақ-корей іскер топтарының дөңгелек үстеліне қатысты, деп хабарлады Ақорданың баспасөз қызметі.
Тоқаев жиында Қазақстанда инновациялық технологияларды дамыту үшін заманауи инфрақұрылым бар екенін атап өтіп, Корея компанияларын елге шақырды.
"Біз компьютерлік техника, желілік жабдықтар, деректерді өңдеу орталықтары бойынша бірлескен өндірістік жобалар ашуға мүдделіміз. Қазақстан 5G желісін өрістету бағытында жұмыс істеп жатыр. Ірі қалаларда алғашқы сынақтар өткізілді. Корея компанияларын елімізде 5G жобаларын іске асыру үдерісіне қатысуға шақырамын", — деді президент.
Сонымен қатар мемлекет басшысы Оңтүстік Кореяның Қазақстан үшін аса маңызды стратегиялық әріптес екеніне тоқталды, деп хабарлады Ақорданың сайты.
Оның айтуынша, соңғы 15 жылда Сіздің еліңізден келетін тікелей инвестиция көлемі 6 миллиард доллардан асты. Қазақстанда кореялық капитал салынған 550-ден астам кәсіпорын табысты жұмыс істеп жатыр. Олардың қатарында Samsung, Hyundai, Lotte, Posco, KNOC және басқа да жетекші корпорациялар бар. Осы компаниялардың қатысуымен жалпы құны 2,5 миллиард доллардан асатын 24 ірі жоба жүзеге асырылды. Әсіресе, кореялық SK Engineering & Construction компаниясының қатысуымен жүзеге асырылып жатқан Үлкен Алматы айналма тасжолының (БАКАД) құрылысын айтуға болады.
Президент автомобиль жасау, тұрғын үй құрылысы, металлургия және ауылшаруашылығы сияқты салаларда жалпы құны 1,5 миллард доллардан асатын келешегі зор үміт күттіретін 16 инвестициялық жобаның іске асырылатыны туралы айтты.
"Қайта өңдеу өнеркәсібіндегі жоғары технологиялы өндіріс, сондай-ақ, Индустрия 4.0 технологияларына стратегиялық тұрғыдан мүдделіміз. Оңтүстік Корея экономиканы цифрландыру бойынша әлемдік көшбасшы және 5G желілері саласында үздік болып танылды", – деді Қасым-Жомарт Тоқаев.
Ол сондай-ақ жер қойнауын пайдалану саласының зор мүмкіндіктерін пайдалануға шақырды. Қазақстанда жер аумағының 25 пайызына ғана геологиялық зерттеу жүргізілгенін айтты.
Бұл ретте мемлекет басшысы асыл және түсті металдарды өндіру бойынша бес дайын жобаның бар екенін атап өтіп, корей компанияларын Қазақстанның жер қойнауын бірлесіп игеруге шақырды.
Қазақстан президенті кореялық әріптесімен әңгіме барысында біздің елдегі табиғи ресурстарға бірлесіп зерттеу жүргізу туралы ұсыныс айтқанын, кейін табиғи байлықты игеру барысында корей компанияларына құқықтық басымдық берілуі мүмкін екенін жеткізді.
Екі елдің басшылары тағы не туралы сөйлесті
Қазақстан президенті өз сөзінде баламалы және жаңағыртылатын қуат көздерін дамытуға басымдық берілетінін атап өтті. Мемлекет басшысы жел және күн энергиясын пайдаланудың әлеуеті зор екенін айтып, корей компанияларына осы саладағы инвестициялық мүмкіндіктерді қарастыруды ұсынды. Одан бөлек, Қасым-Жомарт Тоқаев форумға қатысушыларды Қазақстанда Корея технологиялары бойынша ядролық отынды бірлесіп өндіруге, сондай-ақ, қалдықтарды энергетикалық жою саласындағы жобаларды іске асыруға шақырды.
Қасым-Жомарт Тоқаев Оңтүстік Кореямен машина жасау саласындағы ынтымақтастықты жоғары бағалап, бұл елдің ірі компанияларының қатысуымен автомобиль жасау саласы Қазақстан экономикасының қарқынды дамуына үлес қосқанын атап өтті. Осыған байланысты президент автомобильдер желісін ұлғайтуға және өндіріс орындарын арттыруға әзір екенін мәлімдеді.
Мемлекет басшысы кореялық компаниялармен бірлесіп мұнай-газ өнеркәсібіне арналған жабдықтар мен қосымша бөлшектердің, сондай-ақ, жаңа технологиялар негізінде ауылшаруашылығы өнімдерін терең қайта өңдеу бойынша өндіріс ашуға мүдделі екенін айтты.
Сонымен қатар Қасым-Жомарт Тоқаев Қазақстан арқылы Азиядан Еуропаға жүк тасымалдау және корей экспортын Еуразиялық экономикалық одақ нарығына да әртараптандыру мүмкіндіктеріне тоқталды.
Президент инвесторларға арналған институционалдық ортаны қалыптастыру туралы айта келе,"Kazakh Invest" ұлттық компаниясының, арнайы экономикалық және индустриалдық аймақтардың, сондай-ақ, "Астана" Халықаралық қаржы орталығының әлеуетін пайдалануға шақырды.
Мемлекет басшысы сөзін қорытындылай келе аталған іс-шара екі ел арасындағы сауда-экономикалық өзара іс-қимылды тереңдетуге жасалған нақты қадам екенін айтты.
Қасым-Жомарт Тоқаев кореялық кәсіпкерлермен нақты жұмыс істеу үшін премьер-министрдің орынбасары Роман Склярдың жетекшілігімен арнайы жұмыс тобын құру туралы шешім қабылдағанын айтты. Президент ірі инвестициялық, институционалдық, инрақұрылымдық жобаларды жүзеге асыруды және оған жеке мониторинг жүргізуді өз бақылауына алатынын атап өтті.
Дөңгелек үстел қорытындысы бойынша жалпы сомасы 1,7 миллиард АҚШ доллары болатын 34 келісімге қол қойылды. Оның 21-і коммерциялық және 13-і коммерциялық емес құжат. Корей технологиясын тартуға басымдық беретін бірлескен инвестициялық жобаларда, жоғары тиімділігі мен өндірістің экологиялық тазалығына басты мән берілген.
