НҰР-СҰЛТАН, 22 мамыр – Sputnik. Жыл басынан бері көпбалалы отбасылар 92,8 миллиард теңгеге жәрдемақы алды, деп хабарлады еңбек және халықты әлеуметтік қорғау министрлігі.
"2021 жылдың қаңтарынан сәуіріне дейін орта есеппен 440,1 мың көпбалалы отбасы 92,8 миллиард теңге мемлекеттік жәрдемақы төленді. Сәуірде жәрдемақының бұл түрін 448,9 мың отбасы алды, оған 23,6 миллиард теңге жұмсалды", - делінген хабарламада.
Аталған мемлекеттік жәрдемақыға 4 және одан да көп бірге тұратын кәмелетке толмаған немесе 23 жасқа дейінгі күндізгі бөлімде оқитын студент балалары бар отбасылар табысына қарамастан үміткер бола алады.
Төлемдердің мөлшері балалар санына байланысты сараланған: 4 балаға – 46 760 теңге, 5 балаға – 58 457 теңге, 6 балаға – 70 154 теңге, 7 балаға – 81 852 теңге, 8 балаға – 93 344 теңге, 9 балаға – 105 012 теңге, 10 балаға – 116 680 теңге, 11 балаға – 128 348 теңге, 12 балаға – 140 016 теңге, 13 балаға – 151 684 теңге, 14 балаға – 163 теңге 352 теңге, 15 балаға – 175 020 теңге, 16 балаға – 186 688 теңге.
Еске сала кетейік, көпбалалы отбасыларға олардың кірістерін есепке алмай берілетін жаңа мемлекеттік жәрдемақы Қазақстанда 2020 жылдың 1 қаңтарынан бастап атаулы әлеуметтік көмек көрсетудің жаңа тетіктерінде көзделген табысы аз және көпбалалы отбасыларды қолдаудың үш негізгі бағыты шеңберінде енгізілген болатын.
