НҰР-СҰЛТАН, 5 наурыз – Sputnik. Қазақстанда 2025 жылға дейін бес жаңа мұнай-газ химия зауыты пайда болады. Бұл туралы энергетика министрі Нұрлан Ноғаев мәлімдеді, деп хабарлайды Sputnik Қазақстан тілшісі.
Айтуынша, министрлік мұнай-газ химия өндірісін жеделдету және әлеуетті инвесторлар үшін тартымды жағдай жасау үшін Мұнай-газ химияны дамыту жөніндегі ұлттық жоба әзірлейді.
Жоба мұнай-газ химия жобаларын шикізатпен қамтамасыз ету, мұнай-газ химия кластерін құру, қайта өңдеуді дамыту мәселелерін шешуге бағытталған.
Бұдан бөлек, мұнай-газ химия жобасын іске асыру кезінде үкімет пен инвестор арасында жеке келісім әзірлеу мәселесі пысықталуда.
"Жоғарыда аталған шаралар 2025 жылға қарай 5 зауыттың құрылысын аяқтауға мүмкіндік береді. Оның ішінде Атырау облысында үш зауыт: қуаты жылына 500 мың тонна полипропилен өндіретін зауыт; техникалық газдар – қуаты 57 миллион текше метр азот және 34 миллион текше метр құрғақ сығылған ауа өндіру бойынша; қуаты жылына 430 мың тонна полиэтелентерефталат өндіру бойынша үш зауыттың құрылысы аяқталады", - деді Ноғаев энергетика министрлігінің кеңейтілген алқа отырысында.
Сондай-ақ, Шымкентте қуаты жылына 81 мың тонна полипропилен және Шымкент мұнай өңдеу зауытының шикізаты базасында қуаты жылына 57 мың тонна бензинге арналған октан арттырғыш қоспаларды өндіретін жаңа зауыт салынады.
Оқи отырыңыз: Тоқаев көміртегі саласындағы Қазақстанның 2060 жылға дейінгі жоспарын жариялады
Оралда қуаты 182 мың тонна метанол және гликоль өндіретін зауыт бой көтереді.
Министр осы жобалардың арқасында өндіріс көлемі 9 есе артып, 2 миллион тонна мұнай-газ химия өнімін, ел экономикасына инвестиция көлемі шамамен 3,9 миллиард долларды құрайтынын атап өтті.
Қашағандағы жаңа жоба
Сондай-ақ, биыл Қашаған кен орнында газ өңдеу зауытының құрылысын бастау жоспарланып отыр. Жоба құны – 860 миллион доллар.
"Осы жобаны іске асырудан күтілетін нәтиже – қосымша 800 миллион текше метр тауарлық газ өндіру және жаңа жұмыс орындарын құру, сондай-ақ, мұнай өндіру көлемін қосымша 10 миллион тоннаға дейін өсіру. Оператормен бірлесіп, біз осы жылдың соңына дейін Одан әрі кеңейту тұжырымдамасын пысықтауымыз керек", - деді Ноғаев.
Бұған қоса, оның айтуынша, Қашаған кен орнын толық көлемде игеру тұжырымдамасы әзірленеді.
Қазір тәжірибелік-өнеркәсіптік игеру кезеңінің барлық нысаны пайдалануға берілді, олардың өндірістік қуаты тәулігіне 400 мың баррельді құрайды.
