АЛМАТЫ, 6-наурыз – Sputnik. Шығыс Қазақстан облысынан табылған Берел қорғанының құнды жәдігерлерін енді Мәскеу тұрғындары мен қонақтары да тамашала алайды.
"Ұлы дала алтындары" деп аталатын көрме Ресейдің қазіргі заманғы тарих музейінде наурыздың 6-сы мен 25-сі аралығында өтеді.
Көрмеге көздің жауын алатын қымбат алтын әшекейлермен қатар, Шығыс Қазақстандағы Берел қорғанынан табылған қару-жарақтар, тұрмыстық бұйымдар да қойылмақ. Көне жәдігерлер біздің эрамызға дейінгі І мыңжылдықтағы көшпенділердің өмір сүру салты мен мәдениетін көз алдымызға келтіреді.
"Ұлы дала алтындары" көрмесі Ресей астанасында өтеді. Оған Ресейдегі Қазақстан елшілігі, Шығыс Қазақстан облысының әкімдігі және Шығыс Қазақстан облыстық тарихи-өлкетану музейі қолдау көрсетіп отыр.
Берел қорғаны туралы не білеміз?
ХІХ ғасырдың ортасында орыстың шығыстанушы, түрколог маманы Василий Радлов Шығыс Қазақстанда сенсациялық жаңалық ашты. Ол Берел ауылы маңындағы қазба жұмыстары кезінде ескі қорғанға тап болады. Ал қорғанда ақсүйек адам жерленген боп шыққан. Онымен бірге 17 жылқының сүйегі табылған.
ХХ ғасырдың соңында тағы бір жаңалық ашылды. 1998-1999 жылдары Зейнолла Самашев бастаған отандық археологтар ғылыми экспедиция кезінде осы өңірден тағы бір ескі қорымды анықтады. Одан 13 жылқымен жерленген бірнеше ер адам мен әйелдің мүрдесі табылған. Одан бөлек ескі қорымнан көптеген алтын әшкелейлер де шықты.
Мәскеу музейіндегі қазақстандық суретшілердің картиналары
Сейсенбіде, яғни 5 наурызда Мәскеудегі "Зураб Церетели өнер галереясы" музей-көрме кешенінде Ә.Қастеев атындағы мемлекеттік өнер музейі өткізген "Алпысыншы жылдықтар. Түрік романтизмі" көрмесі ашылды.
Жалпы, 60-шы жылдарғы суретшілердің шығармашылығы Қазақстандағы көркем ойлардың гүлдену кезеңі деп есептеледі. Сол кезде оларды "Балалар есейді" деп атады. Өйткені суретшілер бұл кезде академиялық канондардан бас тартып, өнерде өзіндік ізденіске түсіп, бөлек стиль қалыптастырды.
Сәрсенбіде, яғни 6 наурызда көрме залында Қазақстан мен Ресейдің мәдениет саласындағы өзара байланысына арналған дөңгелек үстел өтеді.
Айта кетсек, ресейлік аудиторияны қазақтың ежелгі тарихы мен қазақстандықтардың шығармасымен таныстыру екіжақты мәдени байланысты дамыту, Ресеймен арадағы қарым-қатынасты одан әрмен нығайту үшін жасалып жатыр.
