АСТАНА, 26 сәуір – Sputnik. Словакия премьер-министрі Роберт Фицо Киев Еуропалық одақтан кредит алғаннан кейін "Дружба" мұнай құбыры қайтадан істен шықты десе, бұған таңғалмайтынын мәлімдеді.
"Кеше Еуропалық комиссия төрағасымен (Урсула фон дер Ляйен – ред.) бейресми әңгіме барысында өз пікірімді білдірдім: егер әскери мақсаттарға арналған 90 миллиард еуро көлеміндегі кредитті алғаннан кейін (Владимир Зеленский – ред.) "Дружбаның" жұмысын қайта тоқтатуды ұйғарса, мен мүлде таңғалмайтынымды жеткіздім", — деді Фицо әлеуметтік желідегі ресми парақшасында жариялаған видеоүндеуінде.
Ол Украинадағы қақтығыстың әскери шешімі жоқ екенін және оны тек дипломатиялық жолмен реттеуге болатынын мәлімдеді.
Украина 27 қаңтардан бастап өз аумағы арқылы Словакия мен Венгрияға Ресей мұнайын жөнелтуді тоқтатып, оған "Дружба" құбыры зақымданғаны себеп болғанын айтты. Венгрия мен Словакия билігі бұған сенбей, мұнай транзитінің тоқтатылуын Киевтің саяси шешімі деп санайтынын мәлімдеді. Словакия билігі 23 сәуірде республикаға "Дружба" арқылы мұнай жеткізу қайта жанданғанын хабарлады.