АСТАНА, 15 сәуір – Sputnik. Ресей мен Әзербайжан Ақтау маңында AZAL әуе компаниясы ұшағының апатқа ұшырауына байланысты барлық мәселені реттеу жөнінде келісімге келді. Бұл туралы екі елдің сыртқы саяси ведомстволарының бірлескен мәлімдемесінде айтылған.
"Тараптар 2024 жылдың 25 желтоқсанында Ресей әуе кеңістігінде әуе шабуылына қарсы қорғаныс жүйесінің абайсыз әрекеті салдарынан Embraer 190 ұшағының Ақтау қаласы маңында құлауына байланысты барлық мәселені, соның ішінде өтемақы төлеуді қоса алғанда, толық реттеуге келісті", – делінген құжатта.
Дипломаттардың айтуынша, бұл қадамдар екі елдің одақтастық форматтағы өзара тиімді ынтымақтастықты одан әрі дамытуға деген ортақ ұмтылысын растайды.
Сондай-ақ дипломаттар әуе апаты салдарынан қаза тапқандардың туыстары мен жақындарына көңіл айтты.