АСТАНА, 8 сәуір – Sputnik. Астананың салықшылары көлік салығынан бюджетке түскен қаржының көлемі жариялады, деп хабарлайды Sputnik Қазақстан әкімдіктің ресми сайтына сілтеме жасап.
Жыл басынан бері жеке тұлғалардың көлік құралдарына салынатын салық бойынша бюджетке 10 млрд теңгеден астам қаржы түсті. Бірақ салықты төлемегендер де аз емес.
"Бүгінгі таңда көлік салығы бойынша берешек көлемі 7 млрд теңгені құрап отыр", - дейді салықшылар.
Ал салықты уақытылы төлемеген жағдайда әрбір кешіктірілген күн үшін өсімпұл есептеледі. Бұдан бөлек, берешегі бар азаматтарға қатысты мәжбүрлеп өндіріп алу шаралары қолданылады. Атап айтқанда, борышкерлерге хабарлама жолданып, салық бұйрығы шығарылады, сондай-ақ материалдар жеке сот орындаушыларына беріледі.
1 айлық есептік көрсеткіштен асатын берешек міндетті түрде мәжбүрлі түрде өндіріп алуға жатады. Ал салық бұйрығын орындау мерзімі 30 жұмыс күнін құрайды.
Айта кетері, салық берешегін бірнеше ыңғайлы цифрлық сервистер арқылы тексеруге болады. Олар:
МКК ресми сайты – kgd.gov.kz;
eGov.kz порталы;
eSalyq Azamat мобильді қосымшасы.
Ал елден шығуға уақытша шектеулердің бар-жоғын aisoip.adilet.gov.kz сайтынан білуге болады.