"Енесі де, әйелі де әкімдікте істеген": Талғардағы қанды оқиғаға қатысты тың ақпарат шықты

АСТАНА, 5 наурыз – Sputnik. Алматы облысы Талғар қаласында 47 жастағы ер адамды әйелі мен енесі пышақтап өлтірді. Оқиғаның мән-жайын Sputnik Қазақстан тілшісі барып білді.

Оқиға туралы марқұмның туыстары айтып берді.

"Әйелі үш жылқысын күйеуіне айтпай сатып жіберген. Бауырымыз полицияға арыз жазады, полиция кім сатқанын, кімге сатқанын бәрін дер кезінде анықтап берген. Жылқыны сатып алған адам осы үйдің әйелін көрсеткен. Бірақ әйел мойындамаған, содан жанжал шыққан", - дейді марқұмның Қайрат есімді туысы.

Оның сөзінше, күдікке ілінген енесі де, әйелі де Талғар әкімдігінде жұмыс істейді.

Талғарда ер адам енесі мен әйелінің қолынан мерт болды - қанды оқиға болған пәтер

"Әйелі Талғар әкімі орынбасарының хатшысы, ал енесі сол әкімдікте кіре берісінде отырады, күзетші. Біздің ойымызша сол себепті де шулатпай жасырып ұстады", - дейді марқұмның туысы.

Туыстарының айтуынша, әйелі мен енесінің қолынан айуандықпен ажал құшқан ер адам кәсіпкер болған. Мал шаруашылығы бар, қалада газға байланысты қызмет көрсететін серіктестікте басшы қызметін атқарған.

"Ағамызды өлтіріп тастап, 5 сағат бойы балконда тығылып жатқан. Ағамыз жан дауысы шығып айқайға басқан, есіктен шыға алмаған. "Помогите" деп айқайлаған. Қарама-қарсы тұратын көршісі үй иесіне хабарласып, сенің үйіңде сұмдық боп жатыр деген. Пәтердің иесі 10 минутта жетіп келіп, полиция шақырған", - дейді туысы.

Күйеуін өлтірді деген күдікті әйел 39 жаста.

"Қазір 4 баласы ауылда, марқұмның әке-шешесінің қолында. Үлкені 15, ең кішісі 4 жаста. Оқиға сол төрт баланың көз алдында болған. Марқұм ағамыздың денесінің сау тамтығы қалмаған", - дейді туысы.

Талғарда ер адам енесі мен әйелінің қолынан мерт болды - қанды оқиға болған үй

Марқұм өлерінен 4 сағат бұрын отбасындағы жағдайы жақсы екенін айтып қарындасына хабарласқан.

"Кішкентай ұлмен үйдемін, ұйықтайын деп жатырмын. Қалған балалар қосымша сабақта деді. Бұл сағат 18:30 шамасында болды. Сағат он кезінде полиция ағаңыз ауыр жарақат алды деп хабарласты. Біз дереу келдік, үйге кіргізбеді. Есік алдында тұрғанда төрт баланы алып шығып, полиция маған берді. Қазір балалар ауылда, сабақтарына барып жүр, менің әке-шешемнің қолында. Ағамның бірінші отбасынан үш баласы, екінші отбасынан төрт баласы бар", - дейді марқұмның Әлия есімді қарындасы.

Зардап шеккен отбасының адвокаты Асылбек Әбдірайымовтың айтуынша, сараптама жасалып, тергеу жүріп жатыр. Марқұмның денесінде 30-дан астам пышақ жарақаты болған.

Алматы облыстық полиция департаменті күдікті екі әйел қамауға алынып, тергеу жүріп жатқанын айтты.

Талғарда ер адам енесі мен әйелінің қолынан мерт болды - қанды оқиға болған үйдің подъезі