АСТАНА, 8 ақпан – Sputnik. Украина басшысы Владимир Зеленский Ресейдің жоғары дәлдіктегі қару-жарақтарын жасауға қажетті бөлшектерді жеткізді деп айыпталған ресейлік және шетелдік компанияларға қарсы жаңа санкциялар енгізілгенін мәлімдеді.
"Осындай компанияларға – компоненттерді жеткізушілер мен зымырандар мен дрондарды өндірушілерге біз жаңа санкциялар енгіздік… Екінші жарлықпен Ресейдің қаржы секторына қарсы санкциялар енгізіледі", — делінген Зеленскийдің Telegram каналына жарияланған хабарламада.
Сонымен қатар, Зеленскийдің айтуынша, криптовалюталармен байланысты деп саналатын құрылымдарға да санкциялар салынған. Бұл шешімдердің бір бөлігі Еуропалық одақтың 20-шы санкциялар пакетіне кіреді.
Зеленскийдің ресми сайтында санкцияға ілінген тұлғалар мен компаниялардың тізімі көрсетілген құжаттар жарияланды. Олардың қатарында Ресей, Қытай, Қырғызстан, Грузия, Панама және басқа елдерден 66 жеке тұлға мен 60 компания бар.
Киев енгізетін санкциялар дәстүрлі түрде Украина аумағындағы активтерді бұғаттауды, лицензияларды жоюды, ресми сапарларға тыйым салуды, зияткерлік меншік объектілерін беруге тыйым салуды, сауда келісімдерін, мәдени алмасуларды және ғылыми ынтымақтастықты тоқтатуды, сондай-ақ Украинаның барлық мемлекеттік наградасынан айыруды қамтиды.