АЛМАТЫ, 12 желтоқсан – Sputnik. Солтүстік Қазақстан облысында химия пәнінің мұғалімі сабақ үстінде күйіп қалды, деп хабарлайды Sputnik Қазақстан.
Оқиға 10 желтоқсанда Шал ақын ауданы Сергеевка қаласының орта мектебінде болған.
"Аудандық ауруханаға қолын, мойнын және көкірек қуысын термиялық күйік шалған 24 жастағы тұрғыны жүгінген. 11 желтоқсанда полицейлер тексеру барысында әйелдің сабақ үстінде дене жарақатын алғанын анықтады. Химиялық эксперимент жүргізу кезінде жарылыс болып, оның киімінің жеңі өртенген. Жалынды тоғызыншы сынып оқушылары сөндірген", - дейді Солтүстік Қазақстан облыстық полиция департаменті.
Балалардың ешқайсысы жарақат алған жоқ.
"Материалдар қауіпсіздік техникасының сақталуын тексеру үшін мемлекеттік еңбек инспекциясы комитетінің департаментіне жіберілді. Бұдан басқа, облыстың білім басқармасына оқу сабақтарын өткізу кезінде қауіпсіздік техникасының бұзылуын жою жөнінде шаралар қабылдау туралы ұсыныс енгізілді", - дейді ведомство.