АСТАНА, 28 қараша – Sputnik. Қасым-Жомарт Тоқаев осы уақытқа дейін өзін-өзі ұсынғандардың арасынан неше адам әкім болғанын айтты, деп хабарлайды Sputnik Қазақстан тілшісі.
Қазақстанда ауыл әкімдерін сайлау жүйесі бес жылдың ішінде біртіндеп жүзеге асырылды.
"Бүкіл еліміз бойынша 2334 ауыл әкімі сайланды. Олардың орташа жасы – 43 жас. Жаңадан сайланған әкімдердің үштен бірі – бұрын мемлекеттік қызметте болмаған азаматтар" , - деді Тоқаев бүгін әкімдердің форумында.
Оның айтуынша, саяси ұйымдардың 1500-ден астам өкілі әкім болып сайланды.
"Жаңа басшылардың қатарында алты партияның мүшелері бар. Ал 700-ден астам азамат өзін-өзі ұсынып, сайлауда жеңіске жетті", - деді президент.
Мемлекет басшысы жалпы нәтиже жаман емес екенін де жеткізді. Ең бастысы, олар жергілікті жұрттың мұң-мұқтажын, шешімін таппай жатқан түйткілдерді жақсы біледі. Ал жақында жүргізілген сауалнамаға сәйкес, ауыл тұрғындарының 84 пайызы өз әкімдеріне сенеді.