АСТАНА, 30 қыркүйек – Sputnik. Еуразиялық экономикалық комиссия алқасының төрағасы Бақытжан Сағынтаев ЕАЭО, ТМД, Иран, Куба үкімет басшыларымен бірге "Иннопром. беларусь" халықаралық өнеркәсіп көрмесінің аясында "Жаңа технологиялар одағы: болашақ өнеркәсібін құру" пленарлық отырысына қатысты.
Сессия алдында көрмені ресми аралау барысында премьер-министрлер өнеркәсіптік компаниялардың өнімдерімен және инновациялық технологияларымен танысты, оның ішінде Комиссия стендін аралап көрді.
"Үкімет басшыларына ЕАЭО аясында өнеркәсіптік кооперацияны қаржыландыру тетігін іске асырудың алғашқы нәтижелері туралы хабардар етілді. Ол ұйымға мүше мемлекеттердің бизнесі мен экономикасы үшін экономикалық тиімділік береді, соның ішінде жаңа жұмыс орындарын құру және Одақ бюджеттеріне салық түсімдерін арттыруды көздейді", - делінген ЕЭК баспасөз қызметінің хабарламасында.
Пленарлық отырыста машина жасау, өндірісті автоматтандыру және цифрландыру, ұшқышсыз технологиялар, жасанды интеллект сияқты салаларда өнеркәсіптік кооперация мен интеграцияны дамыту векторлары анықталды.