АЛМАТЫ, 24 қыркүйек - Sputnik. Еуразиялық экономикалық комиссияның (ЕЭК) төрағасы Бақытжан Сағынтаев Біріккен Араб Әмірліктерінде Абу-Даби үкіметінің цифрлық кеңсесінің басшысы Мохаммед Абдул Хамид Әл-Асқармен жұмыс кездесуін өткізді, деп хабарлады ЕЭК баспасөз қызметі.
Тараптар Еуразиялық экономикалық одақ (ЕАЭО) пен БАӘ арасындағы цифрлық технологиялар мен жасанды интеллект саласындағы ынтымақтастық перспективаларын талқылады.
ЕЭК алқасының басшысы Комиссия ЕАЭО елдерімен бірге елдердің цифрлық егемендігін сақтайтын және үздік технологиялық шешімдердің үйлесімділігін қамтамасыз ететін Цифрлық одақ тұжырымдамасын әзірлеу бойынша жұмыс жүргізіп жатқанын хабарлады.
"Осыған байланысты БАӘ-мен, әсіресе экономикалық ынтымақтастықтың жаңа форматы жағдайында практикалық тәжірибе алмасу өте маңызды болып саналады", - деді Сағынтаев.
Кездесу қорытындысы бойынша тараптар цифрлық технологиялар мен ақпараттық-коммуникациялық жүйелер салаларындағы ынтымақтастық мүмкіндіктерін пысықтауға келісті.