АСТАНА, 27 тамыз – Sputnik. Еуразиялық экономикалық комиссия алқасы Вьетнамнан әкелінген киім-кешектің кейбір түрлеріне триггерлік қорғаныс (автоматты түрде іске қосылатын қорғаныс механизмі – агенттік) шарасын қолдану туралы шешім қабылдады, деп хабарлады комиссия.
ЕАЭО мен Вьетнам арасындағы еркін сауда келісімі бойынша тауарлар тарифтік жеңілдіктермен импортталады.
Бұл Алқа шешімі күшіне енген күннен бастап алты ай ішінде тауарлардың жекелеген түрлері ЕАЭО Бірыңғай кедендік тарифінің қолданыстағы бағамы бойынша импортталатынын білдіреді, деп түсіндірді комиссия.
Шара Вьетнамнан келетін тауарлар келісімде қарастырылған көлемнен асып кетуіне байланысты енгізілді.
"Бұл шара Одақ өндірушілеріне қолдау көрсетеді және Вьетнамнан бажсыз әкелінген тауарлардың келісімде қарастырылған деңгейден күрт артып кетуін болдырмайды, бұл біздің елдеріміздің жеңіл өнеркәсібі үшін маңызды", - деді ЕЭК сауда министрі Андрей Слепнев.
Шешім ресми жарияланғаннан кейін күнтізбелік 30 күн өткен соң қолданысқа енгізіледі.