АСТАНА, 21 тамыз – Sputnik. Еуропалық Одақ Украинаға ешқандай қауіпсіздік кепілдігін ұсына алмайды, деді Венгрия сыртқы істер министрі Петер Сийярто. Бұл туралы РИА Новости хабарлады.
"Көптеген Батыс мемлекеті Украина Еуропалық Одаққа кірсе, бұл қауіпсіздік кепілдігін де білдіреді деп санайды. Еуроодақ мұндайға арналмаған, бұл әскери одақ емес. Еуроодақ әскери ұйым болмағандықтан, оған мүшелік ешқандай қауіпсіздік кепілдігін бермейді", - деді Сийярто телеарна бағдарламасының эфирінде.
Оның айтуынша, Украинаны Еуроодаққа кіруге итермелеу бүкіл қоғамдастықтың болашағына қауіп төндіреді. Себебі, "қауіпсіздік, саясат, экономика, қаржы, ауыл шаруашылығы тұрғысынан бұл Еуроодақ үшін ауыртпалық пен болжауға болмайтын салдарларды білдіреді".
Бұған дейін Германия канцлері Фридрих Мерц Украина бойынша Вашингтонда өткен кездесудің қорытындысы бойынша Украинаның қауіпсіздік кепілдігіне кім және қаншалықты қатысатыны туралы мәселені еуропалық серіктестермен және Америка үкіметімен талқылау керек деп мәлімдеген.
Ресей сыртқы істер министрлігі Украинаға НАТО әскерін орналастыру Ресей үшін мүлдем қолайсыз және оның қақтығысты шиеленістіруі мүмкін деп мәлімдеді.