АЛМАТЫ, 6 тамыз - Sputnik. KazFoodProducts компаниялары мен UBM Group венгриялық холдингі премикс өндірісі бойынша бірлескен кәсіпорын құру туралы инвестициялық келісімге қол қойды, деп хабарлайды "АРК жаңалықтары" ақпарат агенттігі.
Премикс – бұл құрама жемді байытатын теңдестірілген дәруменді-минералды кешен.
Ауыл шаруашылығы министрлігінің мәліметінше, зауыт Алматы облысының аумағында салынады.
"Жобаның қуаттылығы жылына 48 мың тонна. Бұл премиксті – ауыл шаруашылығы жануарларына арналған жоғары сапалы жемшөп өндірісіндегі маңызды компонентті өнеркәсіптік өндіруге маманданған Қазақстандағы алғашқы кәсіпорын болады", - делінген хабарламада.
Қазір премикстің басым бөлігін Қазақстан импорттап жатыр. Жаңа зауыт импортқа тәуелділікті айтарлықтай төмендетуге, ішкі өндірісті дамытуға және отандық мал шаруашылығы өнімдерін өндірушілерді тұрақты қамтамасыз етуге мүмкіндік береді.