АСТАНА, 29 маусым – Sputnik. Ресей сыртқы істер министрі Сергей Лавров Украинадағы қақтығыстың барлық мәселесін қалай шешуге болатынын айтты, деп хабарлайды РИА Новости.
Лавров ресми сапармен Қырғызстанға барды. Сол жақта республика президенті Садыр Жапаров пен сыртқы істер министрі Жээнбек Кулубаевпен кездесті. Ал келіссөздердің қорытындысы бойынша брифинг өткізіп, Украинадағы қақтығыстың барлық мәселесін қалай шешуге болатынын айтып берді.
"Барлық мәселені толығымен шешу үшін түпкі себептерін жою қажет деп білеміз. Ең алдымен Ресей қауіпсіздігіне қатысты қатерлер болмауы керек. Ондай қатерлер Киевті солтүстік атлантикалық альянсқа тарту арқылы НАТО-ны шығысқа қарай кеңейту және Украина жерінде әскери инфрақұрылымды құру жоспарларынан кейін туындады. Бұның барлығы Ресей Федерациясына қарсы бағытталып отыр", - деді Лавров.
Оның айтуынша, Киев орысқа қатысты нәрсенің барлығын заңнамалық тұрғыда жоюды да тоқтатуы қажет. Ал Украинадағы орыстар мен орыс тілді тұрғындардың құқықтары сақталуы шарт.
Айта кетері, Лавровтың ресми сапары екі күнге созылады. Ол ел басшылығымен кездескеннен кейін ҰҚШҰ сыртқы істер министрлер кеңесінің отырысына да қатысады.