АСТАНА, 10 маусым – Sputnik. Ақтөбеде Кеңес Одағының Батыры Әлия Молдағұлованың 100 жылдық мерейтойы аясында форум өтті. Шарад 300 Әлия бас қосты, деп хабарлайды облыс әкімдігі.
"Әлия" есімі бүгінде 70 мыңнан астам азаматшаға берілген. Оның ішінде 4 мыңға жуығы Ақтөбе облысында тұрады екен.
"Мен – Әлиямін!" атты ауқымды жиынға батыр қызбен аттас 300-ге жуық нәзік жан жиналды.
Форумға келгендердің ең үлкені – 88 жастағы қария болса, ең кішісі – 2 айлық сәби. Айта кетерлігі, таңғы сағат 07:45-те тағы бір Әлия дүниеге есігін ашқан.
"Форумға жиналған 300 қатысушының дені – дәрігер, мұғалім, өнер және спорт саласының үздіктері. Әрқайсысы өз саласында жетістікке жетіп, елге қызмет етіп жүрген жандар. Ерекше атап өтерлігі, қатысушылардың қатарында батырдың туған күнінде дүниеге келген 4 Әлия және "Ілия" есімімен тіркелген, бірақ бейресми түрде Әлия деп аталатын жандар да болды", - дейді әкімдік.
Жиын барысында әр салада үздік нәтижелерге қол жеткізген Әлияларға құрмет көрсетілді. Батырдың туған күнінде дүниеге келген Әлияларға гүл шоқтары ұсынылды. Форумға қатысушылар Әлия Молдағұлованың ескерткішіне гүл шоқтарын қойды.