АСТАНА, 26 мамыр – Sputnik. Түркістан облысы Жетісай ауданының диқандары қауынның алғашқы өнімін жинауға кірісті, деп хабарлайды Sputnik Қазақстан.
Түркістан облысында қауын пісті
Су ресурстары және ирригация министрлігі таратқан мәліметке сәйкес, биыл егістікке суармалы су ерте берілді. Соның арқасында диқандар қауынның алғашқы өнімін мерзімінен бұрын жинап жатыр.
"Биыл көктем ерте шыққандықтан қауын да уақытынан бұрын пісті. Қажетті суды дер кезінде жеткізіп беріп отырған "Қазсушар" ұжымына алғысымыз шексіз. Осы еңбектің арқасында қауын да ертерек пісті", - дейді шаруа қожалығының төрағасы Әлфараби Күзенбаев.
Облыс диқандарына суармалы су наурыз айынан беріле бастады. Оны "Қазсушар" филиалымен арнайы келісімшарт жасаған шаруашылықтар ғана алып отыр. Осы уақытқа дейін 8 892 келісім жасалған.