АСТАНА, 23 мамыр-Sputnik. Оқу орындарында соңғы қоңырау салтанатты жиындары мен мектеп бітіру кештері басталды.
Соңғы қоңырау салтанаты елордалық №111 мектепте де өтті. Оқу орны "жайлы мектеп" жобасы аясында салынып, 2024 жылдың қыркүйегінде есігін айқара ашқан.
Мектептің ашылғанына аз уақыт болса да, оқуды "Алтын белгімен" аяқтап жатқан талантты түлектер бар. Аталған оқу орнын барлығы 55 түлек бітірді.
"Осы мектептің алғашқы түлектерінің қатарында болу мен үшін мәртебе, өйткені бүгін маңызды күндердің бірі. Оқу жылында оқушылар да, мұғалімдер де көп күш жұмсады. Мен өзім "Астананың үздік жүргізушісі" байқауында гран-при иегері, сондай-ақ қазақ тілі мен әдебиеті бойынша олимпиадалардың жеңімпазымын", - деді "Алтын белгі" иегері Назерке Айтбайқызы.
Семейде Шәкәрім Құдайбердіұлы атындағы №5 гимназияның оқушыларына соңғы қоңырау соғылды. 100 жылдан астам тарихы бар оқу орнына өңір әкімі Берік Уәли келді.
Айта кетейік, гимназия 2025 жылы білім министрлігі бекіткен "үздік 100 мектептің" қатарына енді. Облыс әкімі атап өткендей, бұл күн білім мен тәрбиені біріктіретін мұғалімдер үшін де, жаңа өмірге қадам басатын оқушылар үшін де қызықты сәт. Жалпы, Абай облысында оқу жылын 100 мыңнан астам оқушы аяқтады.
20 мамырда премьер-министр Олжас Бектенов ата-аналарды мектеп бітіру кештері кезінде балаларын бақылауды ұйымдастыруға шақырған болатын. Министр өз сөзінде, ешқандай министрлік ата-ананың қамқорын алмастыра және балалардың өміріне араласа алмайды деді.
Биылғы оқу жылын 3,9 миллион оқушы, оның ішінде 200 мыңнан астам он бірінші сынып түлектері аяқтайды.