АСТАНА, 20 мамыр – Sputnik. Астанада "Ғасыр" оқу орталығына қатысты ата-аналардан полицияға ұжымдық шағым түсті, деп хабарлайды Polisia.kz.
Тергеу барысында анықталғандай, азаматтар шетелдік жоғары оқу орындарына түсуге дайындық курстарына жазылып, келісімшартқа қол қойып, толықтай төлем жасаған. Алайда көрсетілуге тиіс білім беру қызметтері ұсынылмаған.
"Аталған дерек бойынша қылмыстық іс қозғалды. Қазіргі таңда тергеу амалдары жүргізіліп жатыр", - деп жазылған хабарламада.
Тергеу барысы Астана қалалық полиция департаменті басшылығының бақылауында.
Бұған дейін білім ошағы төңірегінде жанжал шыққан болатын. Ата-аналар балаларының оқу ақысын төлеген, бірақ орталық жабылып қалған. Бұған ашуланған ата-аналар полицияға хабарласып, ақшаны қайтаруды талап еткен. Орталық басшысы із-түзсіз жоғалып кеткен, істі прокуратура қолға алды.
Бүгін үкіметтің брифингінде оқу-ағарту министрі Ғани Бейсембаев орталық төңірегіндегі жанжалға қатысты пікір білдірді. Белгілі болғандай, мемлекет жекеменшік оқу орталықтарына лицензия бермейді.
"Қазір біз жекеменшік мектепке дейінгі ұйымдарды лицензиялау мәселесін көтеріп жатырмыз. Бүгінде жекеменшік қосымша орталықтар лицензия алмайды. Сондықтан ата-аналар қырағылық танытуы керек. Жекеменшік қосымша орталықтарға мұндай бақылау жоқ, болған емес", - деді министр.
Бірақ қажеттілік туындаса, бұл мәселе депутаттармен бірге көтеріледі, деді ол. Оны заң жүзінде және жеке орталықтардың пікірін ескере отырып бекіту керек, деп түсіндірді Бейсембаев.