АЛМАТЫ, 1 мамыр – Sputnik. Алматының Жетісу ауданында Қазақстан халқының бірлігі күні ұзындығы 1704 метр болатын лағман дайындалды, деп хабарлайды қалалық әкімдік.
Рекорд Қазақстанның рекордтар кітабында ресми түрде тіркелді.
50-ден астам аспаз бен аудан тұрғыны 19 кг ұннан қамыр илеп, екі сағат ішінде ерекше тағам дайындады. Оған қазақтар ғана емес, әр түрлі этностың өкілдері – ұйғырлар, дүнгендер, корейлер, өзбектер қатысты.
"Мұндай лағман ел тарихында алғаш рет дайындалды. Біз ұзындығын ғана емес, бірліктің күшін де тіркейміз", - деп атап өтті Қазақстанның рекордтар кітабының өкілі.
Лағман гастрономиялық рекордқа ғана емес, достық пен келісімнің нағыз символына айналды. Мерекені Жетісу ауданының тұрғындары мен этномәдени орталықтары ұйымдастырды.