АСТАНА, 18 сәуір – Sputnik. Мемлекет басшысы Маңғыстау облысына жұмыс сапарымен барып, аймақтың әлеуметтік-экономикалық дамуы жөніндегі кеңеске қатысты, деп хабарлады Ақорда.
Кеңес барысында президент Жаңаөзендегі газ өңдеу зауыты құрылысының кешігуін сынады.
"Мен бұған дейін Жаңаөзендегі газ өңдеу зауытын 2024 жылға қарай іске қосу туралы тапсырма бердім. Бірақ түрлі рәсімдер созылып, мердігермен келісім-шартқа былтыр ғана қол қойылды. Соның салдарынан зауытты іске қосу мерзімі 2027 жылға қалып қойды. Бұл – үкіметтің өрескел олқылығы",- деді Тоқаев.
Мемлекет басшысы үкімет осы мәселені қатаң бақылауға алуы керек екенін айтты.
Президент жаңа жұмыс орындарын ашуға мүмкіндік беретін өңдеу секторына ден қою қажет екенін де айтты. Ол "Ақтау теңіз порты" арнайы экономикалық аймағына салынған инвестицияның жалпы көлемі – 337 миллиард теңге, соның тең жартысы – шетел инвестициясы екенін еске салды.
"Дегенмен жоғары сапалы өнім шығарып, жаңа жұмыс орындарын ашуға мүмкіндік беретін өңдеу секторына басымдық беру қажет. Үкімет пен әкімдік осы салаға егжей-тегжей талдау жасап, тиімді жұмыс жүргізуге тиіс. Қағазбастылық болмауы керек, нақты, нәтижелі жұмыс қажет", - деді Тоқаев.