АСТАНА, 27 наурыз — Sputnik. 2025 жылы 2 185 этникалық қазақ тарихи отанымен табысып, қандас мәртебесін алды. Жалпы 1991 жылдан бері республикаға 1 млн 150 мыңнан астам этникалық қазақ оралды, деп хабарлайды еңбек және халықты әлеуметтік қорғау министрлігі.
Жыл басынан Қазақстанға:
Қытайдан - 46,4%;
Өзбекстаннан - 41%;
Түрікменстаннан - 7,1%;
Ресейден - 1,9%;
Моңғолиядан - 1,6%;
басқа елдерден келді - 2%.
1 наурыздағы жағдай бойынша:
еңбекке қабілетті жастағы этникалық қоныс аударушылар - 60,8%;
кәмелетке толмағандар - 30,8%;
зейнеткерлер - 8,4%.
Қоныс аударған этникалық қазақтар республиканың түрлі өңірлеріне қоныстанды.
Сонымен бірге қандастарды қоныстандыру үшін еңбек күші тапшы өңірлер анықталды. Олар - Ақмола, Абай, Қостанай, Павлодар, Атырау, Батыс, Шығыс және Солтүстік Қазақстан облыстары.
Қоныстандыру өңірлерінде 2025 жылға арналған қандастарды қабылдау квотасы 2 309 адамды құрайды. 2025 жылғы 1 наурыздағы жағдай бойынша қоныстандыру өңірлеріне 389 қандас қоныс аударды.
"Осы өңірлерде қоныстанған қандастарға көшуге субсидия түрінде мемлекеттік қолдау шаралары ұсынылады – бір мезгілде отағасына және отбасының әрбір мүшесіне 70 АЕК (275,2 мың теңге) мөлшерінде, тұрғын үй жалдауға және коммуналдық қызметтерге ақы төлеуге – бір жыл ішінде 15-тен 30 АЕК (59-дан 118 мың теңгеге дейін) мөлшерінде қаражат беріледі", - делінген хабарламада.
Сонымен қатар ерікті қоныс аударудың тиімділігін арттыру мақсатында солтүстік өңірлерге қоныс аударуға ниетті азаматтарға тұрғын үй сатып алу, салу үшін немесе ипотекалық тұрғын үй қарызы бойынша көмек қарастырылған.