АЛМАТЫ, 22 ақпан – Sputnik. Германия канцлері Олаф Шольц Украина басшысы Владимир Зеленскиймен телефон арқылы сөйлескеннен кейін мәлімдеме жасады.
"Украинаға бейбіт келіссөздер үстелінен орын берілуге тиіс<...>. Еуропаның қауіпсіздік мәселесін еуропалықтармен талқылау керек", - деп жазды ол X әлеуметтік желісінде.
Владимир Зеленский АҚШ президенті Дональд Трамп әкімшілігінің сынына ұшырағаннан кейін еуропа лидерлерімен сөйлесуді жиілетіп, бір күнде алты басшыға қоңырау шалды.
Жұма күні Зеленский Telegram каналында еуропалық көшбасшылармен телефон арқылы сөйлескені туралы бес хабарлама жариялады. Атап айтқанда, Зеленский Хорватия премьер-министрі Андрей Пленковичке, Польша президенті Анджей Дудаға, Чехия президенті Петр Павелге, Швеция премьер-министрі Ульф Кристерссонға және Словения премьер-министрі Роберт Голобқа телефон шалды.
Түнге қарай Зеленский Шольцпен сөйлескенін хабарлады. Олар Украинаның әуе шабуылына қарсы қорғанысын және Зеленский мен Трамптың Украинадағы жағдайды реттеу жөніндегі арнайы өкілі Кит Келлог арасындағы бұрынғы әңгімені талқылады.