АСТАНА, 27 қаңтар — Sputnik. Биыл 20 қаңтарда Қазақстанның ветеринариялық бақылау және қадағалау комитеті АҚШ-тың Делавэр және Оңтүстік Каролина Штаттарынан және Германияның Баден-Вюртемберг жерінен құс шаруашылығы өнімдерін әкелуге және транзитке уақытша шектеулер енгізді.
Шектеулер осы аумақтарда құс тұмауының таралуына байланысты. Шектеу алынғанға дейін әкелуге тыйым салынатын өнімдер:
тірі құс және инкубациялық жұмыртқа;
мамық пен қауырсын;
термиялық өңдеуден өтпеген құс еті және құс шаруашылығы өнімдерінің барлық түрлері (кемінде 70°С);
құстарға арналған жемшөп және жемшөп қоспалары (өсімдік тектес жемшөп қоспаларын, химиялық және микробиологиялық синтезді қоспағанда);
таксидермиялық өңдеуден өтпеген аңшылық олжалар;
құстарды ұстауға және союға арналған қолданылған жабдық.
Естеріңізге сала кетейік, 14 қаңтардан бастап Қазақстанда Бранденбург жерінде аусыл ауруының өршуіне байланысты Германиядан мал әкелуге тыйым салынды.