АСТАНА, 29 желтоқсан - Sputnik. Астана аудандарында алдағы Жаңа жылға арналған мерекелік бағдарламалар өтті. Іс-шараларға елорданың 10 000-ға жуық қонағы мен тұрғыны қатысты, деп хабарлайды қалалық әкімдіктің ресми сайты.
Мереке құрметіне қонақтар үшін концерттер, эстафеталар, көңілді старттар, сыйлықтар және тағы басқа іс-шаралар әзірленді.
Елорданың Сарыарқа ауданында қалалық алаңда (қала әкімдігінің алдында) шығармашылық ұжымдардың жаңа жылдық бағдарламасы және шайбалы хоккей бойынша кәсіби хоккейшілердің қатысуымен шеберлік сабақ өтті.
Алматы ауданында Тәуелсіздік даңғылындағы Оқушылар сарайының аумағында балалар шығармашылық ұжымдарының қатысуымен мерекелік концерттік бағдарлама аяқталды.
"Нұра ауданында "Астана Арена" стадионының тұрағында мерекелік іс-шаралар қатысушыларға арналған сыйлықтармен Көңілді старттардан басталды. Қонақтар үшін конькимен сырғанау бойынша шеберлік сабағы, эстафета және концерттік бағдарлама өткізілді. Іс-шаралар кешке дейін жалғасты", - деп жазылған хабарламада.
Сарайшық ауданында "Қазақ Елі" монументінің жанындағы алаңда мерекелік іс-шара ұйымдастырылды. Қонақтар көңілді старттарға қатысып, жүлделерді жеңіп алды. Эстрада жұлдыздары мен шығармашылық ұжымдардың қатысуымен концерттік бағдарлама ұсынылды.
Есіл ауданында ЭКСПО аумағындағы мерекелік бағдарлама екі сағатқа созылды, көрермен қауым шайбалы хоккейден шеберлік сабаққа, жүлделері бар спорттық эстафеталарға және концерттік бағдарламаға да қатысты.
Айта кету керек, слайдтар, тюбингтер мен конькилерді жалға беру, мұз айдындары, фотоаймақтар жұмыс істей бастады.
Мерекелік іс-шараларға барлығы 10 000-ға жуық адам қатысты.