АЛМАТЫ, 23 желтоқсан – Sputnik. Алматыда бірнеше көшенің тұрғындары жылусыз қалды, деп хабарлады "Алматы жылу желілері" жауапкершілігі шектеулі серіктестігі.
Өйткені құбыр жарылған. Серіктестік құбыр әбден тозған дейді.
Бостандық ауданындағы Назарбаев көшесінде орналасқан жылу магистраліндегі құбыр зақымданды. "Алматы жылу желілері" апаттық қызметінің мәліметінше, бұл ақау 1984 жылы пайдалануға берілген құбырдың тозғанынан болды.
Ақау салдарынан Сәтбаев – Достық, Тайманов көшелерінің аумағындағы, сондай-ақ Самал-1, 2, 3 шағын аудандарында тұрғындар жылусыз қалды.
"Құбырдағы ақауды жедел жою үшін "АЛЖЖ" ЖШС-ның жөндеу-құрылыс қызметі жұмыс істеуде. Жылумен жабдықтауды қалпына келтіру 24 желтоқсан сағат 01:00-ге дейін аяқталады деп жоспарланған", - дейді серіктестік.
Жалпы, биыл қалада 25 жылдан астам уақыт пайдаланылған 20 км жылу желісі қайта жөнделді. Бұл бағыттағы жұмыстар келесі жылы да жалғасады.