АСТАНА, 19 желтоқсан – Sputnik. Ұлыбритания Киевке 286 миллион доллар көлемінде әскери көмек көрсетеді, деп хабарлады Франс Пресс агенттігі елдің қорғаныс министрі Джон Хилидің мәлімдемесіне сілтеме жасап.
"Ұлыбритания келесі жылы Украинаға 225 миллион фунт стерлинг (286 миллион доллар) көлемінде жаңа әскери көмек пакетін жариялады", - деп жазды агенттік.
Әскери жеткізілімдер пакетіне әуе және теңіздегі ұшқышсыз ұшақтар, сондай-ақ әуе шабуылына қарсы қорғаныс жүйелері кіретіні айтылды.
Агенттіктің мәліметінше, Украина флотына 92 миллион фунт стерлинг бөлінеді, 68 миллионы әуе қорғанысына жұмсалады, тағы 39 миллионы Киевті ұшқышсыз ұшақтарға қарсы мың радиоэлектронды қорғаныс жүйесімен қамтамасыз етуге жұмсалады. Қалған 26 миллион фунт стерлинг бұрын жеткізілген қаруға сервистік қызмет көрсетуге жұмсалады.
Агенттік Хилидің Ұлыбританиядағы украин әскерилерді оқыту бағдарламасын күшейту жоспарын да жариялағанын хабарлады.
Ресей Украинаға қару-жарақ жеткізу қақтығысты реттеуге кедергі келтіреді, НАТО елдерін қақтығысқа тікелей тартады деп санайды. Ресей сыртқы істер министрі Сергей Лавров Украинаға арналған қаруы бар кез келген жүк Ресей үшін заңды нысанаға айналатынын айтты. Оның айтуынша, АҚШ пен НАТО қару-жарақ жеткізу ғана емес, сонымен қатар Ұлыбритания, Германия, Италия және басқа да елдерде кадрларды дайындаумен қақтығысқа тікелей қатысып отыр.