АСТАНА, 16 желтоқсан – Sputnik. Солтүстік Қазақстан облысында иен далада жоғалып кеткен 43 жастағы ер адам табылды, деп хабарлайды ҚР ТЖМ баспасөз қызметі.
Төтенше жағдайлар басқармасының құтқарушылары полиция қызметкерлері, әкімдік қызметкерлері және жергілікті тұрғындар өкілдерімен бірлесіп, Айыртау ауданында Имантау және Арықбалық ауылдарының арасында із-түзсіз жоғалған 1981 жылы туған азаматты іздестірді.
"Ер адам бір үйір жылқыны айдап келу үшін бір күн бұрын Имантау ауылынан шығып кетіп, қайтып оралмаған. Іздестіру жұмыстарын күшейту үшін дрон қолданылды", - деп хабарлады министрліктің баспасөз қызметі.
Құтқарушылар ер адамды ауылдан сегіз шақырым жердегі ашық жерден тауып, ауылға жеткізді. Ол медициналық көмекке мұқтаж емес.