АСТАНА, 14 желтоқсан – Sputnik. Қыс басталғаннан бері Астанадан бір миллион текше метрден астам қар шығарылды, деп хабарлайды елорда әкімдігінің ресми сайты.
14 желтоқсан қар полигондарына ауыр жүк көлікпен 803 рейс, 10 152 текше метрден астам қар шығарылды.
Ережеге сәйкес, ең алдымен қалада кептеліс болмас үшін өте қарқынды қозғалыс учаскелері тазаланады. Сондай-ақ орташа қарқынды учаскелер - алаңдар, вокзал маңы аумақтары, тротуарлар, әлеуметтік нысандарға кірме жолдар және т. б. орындар қардан тазартылады.
14 желтоқсаннан 15-сіне қараған түні қала көшелеріндегі қар мен мұзды жинауға 160-тан астам жұмысшы мен 600-ден астам арнайы техника шықты.
Елордада бірнеше жабдықталған қар полигоны жұмыс істейді. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылған, жарықтандыру қосылған.
Мамандар елорда тұрғындары мен қонақтарынан жолда абай болуды, қауіпсіздік ережелерін сақтауды, дауылды ескерту болған жағдайда алыс сапардан бас тартуды сұрайды.