АСТАНА, 11 желтоқсан — Sputnik. Биыл қаңтар-қараша айлары аралығында Қазақстанның теміржолымен 236 млн тоннадан астам жүк тасымалданды, деп хабарлайды ұлттық компанияның баспасөз қызметі.
Ел ішінде 154 миллион тоннадан астам жүк тасымалданды, бұл 2023 жылдың сәйкес кезеңімен салыстырғанда 1%-ке көп. Экспортқа 82 млн тонна жүк жөнелтілді. Ірі тасымалдаулар арасында көмір бар. Барлығы 92,6 млн тонна көмір тасымалданды, оның 65,5 млн тоннасы ел ішіндегі тұтынушыларға жіберілді.
Экспортқа 27,1 млн тонна көмір жөнелтілді. Астық тасымалы да айтарлықтай өскен. 9,2 млн тонна астық тиелді, оның 7 млн тоннасы елден тыс жерлерге жөнелтілді. Республика ішінде астық тасымалдау көлемі өткен жылмен салыстырғанда 11%-ке артып, 2,2 млн тоннаға жетті. Ұнтақтау өнімдерін тасымалдау 3%-ке өсіп, 2,9 млн тонна болды, ал экспорт 4%-ке 2,2 млн тоннаға дейін өсті.
Сонымен қатар басқа да маңызды жүктерді тасымалы көлемі артқан. Мұнай жүктерін тиеу көлемі 2,2%-ке ұлғайып, 17,6 млн тоннаны құрады. Қара металдар 4 миллион тонна көлемінде тасымалданды, бұл 2023 жылмен салыстырғанда 2,5%-ке өсті. Түсті кен мен күкірт шикізатын тиеу де 8,5%-ке өсіп, 22,5 млн тоннаға жетті.