АЛМАТЫ, 11 желтоқсан – Sputnik. Алматы облысының прокуратурасы заңсыз митинг ұйымдастыру заңды өрескел бұзу екенін ескертті.
"Жиналыстар, митингілер мен пикеттер сияқты жария іс-шараларды өткізу "бейбіт жиналыстарды ұйымдастыру және өткізу тәртібі туралы" Қазақстанның заңымен қатаң реттеледі. Азаматтардың жауапкершілікпен қарауын және заңсыз митингілерге қатыспауын ескертеміз", - деп жазылған ведомство хабарламасында.
Мұндай іс-шараларды ұйымдастыру және қатысу - заңды өрескел бұзу. Ал заңды бұзғандар жазаланады.
"Мұндай әрекеттер үшін Әкімшілік құқық бұзушылық туралы кодекстің 488-бабымен әкімшілік жауапкершілікке және Қазақстан Республикасы Қылмыстық кодексінің 400-бабымен қылмыстық жауапкершілікке тартылады. Заңсыз акцияларға қатысу әкімшілік қамауға, ірі айыппұлдарға, сондай-ақ қылмыстық қудалауға әкелуі мүмкін екеніне назар аударамыз", - деп ескертті прокуратура.
Еске сала кетейік, бүгін Шерзат Полаттың әкесі Қаржаубай Нұрымов пен оның қарындасы 15 тәулікке қамауға алынғаны туралы ресми ақпарат тарады.