АСТАНА, 19 қараша – Sputnik. Ресей қорғаныс министрлігі ұзақ қашықтықтағы қару-жарақпен Ресей аумағына ықтимал соққы беру жағдайын бақылап отыр, деп хабарлады РФ президентінің баспасөз хатшысы Дмитрий Песков. Бұл туралы РИА Новости жазды.
"Үндістан мен ресейлік БАҚ арасындағы ынтымақтастықтың жаңа мүмкіндіктері: Үндістан мен Ресей халқы арасындағы байланысты нығайту" атты кездесуде журналистердің бірі АҚШ президенті Джо Байденнің әкімшілігі рұқсат бергеннен кейін Киев алыс қашықтыққа арналған қаруды қолданғаны рас па деген сұрақ қойып, Кремльдің реакциясы қандай болатынын сұрады.
"Менде мұндай ақпарат жоқ, бірақ біздің әскерилер жағдайды бақылауда ұстап тұрғанына күмәнім жоқ. Тиісті ақпаратты алған бойда біз жауап береміз", - деді Песков кездесуде.
Бұған дейін New York Times газеті АҚШ әкімшілігінің аты-жөнін атамаған өкілдеріне сілтеме жасай отырып, АҚШ президенті Джо Байден алғаш рет Украинаның Ресей аумағына шабуыл жасау үшін америкалық алыс қашықтықтағы зымырандарды қолдануға рұқсат бергенін хабарлады.
Дереккөздердің айтуынша, Ресей аумағына алғашқы соққылар ATACMS зымырандары арқылы жасалуы мүмкін. Франция мен Ұлыбритания да Украинаға алыс қашықтықтағы қаруларын пайдаланып, Ресей аумағына соққы жасауға рұқсат берді, деп хабарлады Figaro.
Ресей президенті Владимир Путин бұған дейін "Батыс елдерінің Украинадағы қақтығысқа тікелей қатысуы оның сипатын өзгертеді, Ресей өзіне төнген қауіп-қатерлерге негізделген шешім қабылдауға мәжбүр болады" деп мәлімдеді.
