АСТАНА, 22 қазан – Sputnik. Еуропалық парламент сейсенбі күні Страсбургте өткен пленарлық отырыста Киевке Ресейдің тыйым салынған активтерінен түсетін кірістің есебінен 35 миллиард еуро көлемінде несие беру туралы Еуропалық комиссия ұсынған механизмді қолдап дауыс берді, деп хабарлады РИА Новости.
Ресей Федерациясы Еуропадағы ресейлік активтерді бұғаттауды бірнеше рет "ұрлық" деп атады.
Отырыс Еуропарламент сайтында тікелей эфирде көрсетілді. Бұл ұсынысты 635 депутаттың 518-і қолдап, 56-сы қарсы болса, 61 депутат қалыс қалды.
Бұл 35 миллиард еуро "Үлкен жетілік" елдерінен Украинаға 50 миллиард АҚШ доллары (шамамен 45 миллиард еуро) көлеміндегі бұрын келісілген несиенің басым бөлігін құрайды. "Үлкен жетілік" елдері 25 қазанда Вашингтонда ұйымның қаржы министрлерінің отырысында несиеге қосатын нақты жарналарының көлемін жариялайды деп күтілуде.
Бұған дейін бұл ұсынысты Еуропарламенттің халықаралық сауда комитеті де қолдаған болатын.
Еуропарламент бұл шешім енді жазбаша рәсім арқылы техникалық мақұлдау үшін ЕО Кеңесіне жіберілетінін хабарлады.
"Несие Украинаға 2024 жылдың соңына дейін беріледі деп күтілуде. Несие бойынша барлық транш 2025 жылдың соңына дейін төленеді", - делінген Еуропарламент құжаттарында.
Бұған дейін Еуропалық әділет комиссары Дидье Рейндерс те Киевке берілетін несие бірқатар саяси және басқа да алғышартпен өзара түсіністік туралы меморандумға қол қойылғаннан кейін қолжетімді болатынын айтқан.
Ресей сыртқы істер министрлігі Еуропадағы ресейлік активтерді бұғаттауды бірнеше рет "ұрлық" деп атады және ЕО жеке қаражатқа ғана емес, сонымен қатар Ресейдің мемлекеттік активтерін де көздеп отырғанын мәлімдеді. Ресей сыртқы істер министрі Сергей Лавров Батыстың бұл әрекетіне қатысты Ресей жауап беретінін мәлімдеді. Оның айтуынша, Ресей Федерациясының да Батыс елдерінің Ресейде сақтаған қаражатын қайтармауға мүмкіндігі бар.
ЕО және "Үлкен жетілік" елдері Ресей Федерациясының шамамен 300 миллиард еуроны құрайтын валюта қорының жартысына жуығын бұғаттады. 200 миллиардтан астам еуро ЕО-да, негізінен әлемдегі ең ірі есеп айырысу және клиринг жүйелерінің бірі – бельгиялық Euroclear шоттарында жатыр.