АСТАНА, 11 қазан – Sputnik. Астана қаласының мамандандырылған ауданаралық әкімшілік соты "Уақытты кері қайтару" туралы петицияны қарау нәтижесін заңсыз деп тану туралы талап арыз бойынша шешім шығарды, деп хабарлайды Sputnik Қазақстан.
Талап қоюшы Л. "Уақытты кері қайтару" петициясын қарау кезінде заңсыздыққа жол берілгеніне шағымданып, оның нәтижесін заңсыз деп тану туралы талаппен сотқа жүгінген.
Сот іс құжаттарын зерделеп, келесіні анықтады:
Қазақстан Республикасы Әкімшілік рәсімдік-процестік кодексінің (ӘРПК) талаптарына сәйкес "Уақытты кері қайтару" петициясы тіркелді.
Өтініш 50 мың қолдау дауысын жинап, тіркелген.
Өтінішті қарау Сауда және интеграция министрлігіне (Министрлік) тапсырылған.
Жұмыс тобын қалыптастыру үшін министрлік өтініш берушіге, Қазақстан Республикасының парламентіне, мүдделі мемлекеттік органдарға, қоғамдық бірлестікке жұмыс тобының құрамына енгізу үшін кандидатуралар жіберуді сұрап хаттар жолдаған.
Мәжілістің 2024 жылғы 14 маусымдағы хатымен жұмыс тобына қатысу үшін кандидаттар Е.А.Әбіл мен М.А.Әбенов ұсынылды.
Министрдің 2024 жылғы 21 маусымдағы бұйрығымен петицияны қарау жөніндегі жұмыс тобының құрамы бекітіліп, депутат Е.А.Әбіл жұмыс тобы басшысының орынбасары болып тағайындалған.
Жұмыс тобының жұмысы аясында 2024 жылғы 21 маусымда, 16 шілдеде және 2 тамызда 3 отырыс өткен.
2024 жылғы 2 тамызда өтінішті қарау нәтижелері бойынша өтінішті қанағаттандырудан бас тарту туралы шешім қабылданған.
Өтініштерді тіркеу, есепке алу мемлекет пен азаматтық қоғамның өзара іс-қимылы саласындағы уәкілетті орган белгілеген тәртіппен жүзеге асырылады.
ӘРПК-нің 90-6-бабына сәйкес өтінішті қарау нәтижелері бойынша орталық мемлекеттік немесе жергілікті атқарушы органның бірінші басшысы, жергілікті өкілді органның төрағасы мынадай шешімдердің бірін қабылдайды:
1.
өтінішті толық немесе ішінара қанағаттандыру туралы;2.
өтінішті қанағаттандырудан бас тарту туралы.Петицияны қарау және ол бойынша шешім қабылдау рәсімі ӘРПК нормаларымен регламенттелген.
Петицияны қарау нәтижелері бойынша шешімге дау айту туралы талаптарды қарау кезінде сот оны қарау тәртібі мен мерзімдерінің сақталуына ғана баға береді.
Петицияны қарау кезінде рәсімнің бұзылмауына байланысты, сот талап қоюды қанағаттандырудан бас тартты.
Талап қоюшының Мәжіліс депутаты Е.А.Әбіл белгіленген тәртіпті бұза отырып, отырыстың төрағасы болғандығы туралы дәлелін сот қабылдамады. Себебі Е.А.Әбіл жұмыс тобы басшысының орынбасары болғаны анықталды.
Комиссия құрамын қалыптастыру кезінде қандай да бір заңбұзушылықтарға жол берілмеген.
Сот шағымдалған шешім мен петицияны қарау жөніндегі әрекеттер заңды, мемлекеттік органның құзыреті шегінде жасалған және рәсімдік бұзушылықтар анықталмаған деген қорытындыға келді.
Шешім заңды күшіне енген жоқ.