АСТАНА, 7 қазан – Sputnik. Қарағанды және Павлодар облыстарының шекара маңындағы дала өртін сөндіру жалғасуда. Жұмысты жедел штаб үйлестіріп отыр. Өрт аумағы үлкен. Тілсіз жаумен күресті қатты жел, таулы ландшафт және өрт ошақтарына кіреберіс жолдардың болмауы қиындатып отыр.
Өртті сөндіруге Қарағанды облысы ТЖД және жергілікті атқарушы органдарының күштері мен құралдарынан 386 адам, 64 бірлік техника, ҚР ТЖМ мен қорғаныс министрлігінің әуе кемелері жұмылдырылды.
Осы ретте Қарқаралы ауданының әкімі Әділжан Арғынов қазір әлеуметтік желілерде түрлі көмек ұйымдастырып жатқандар туралы ескертті.
"Қазір әлеуметтік желіде қаржы жинау, көмек ұйымдастыру бойынша ақпарат таратылып жатыр. Жауапты адамдарсыз ұйымдастырған көмек адам өмірі үшін қауіпті болуы мүмкін. Қазіргі уақытта күш-құралдар жеткілікті. Сарбаздардың тамағы, демалатын орындары, жанар-жағармаймен толық қамтамасыз етілген", - деді Қарағанды облысы Қарқаралы ауданының әкімі Әділжан Арғынов әлеуметтік желідегі парақшасында.
Естеріңізге сала кетейік, 6 қазанда Қарқаралы ауданында дала өрті басталды. Оны жою үшін құтқарушылар оқиға орнына бірден жетіп, жедел өрт сөндіру штабы орналастырылды. Облыс әкімі Ермағанбет Бөлекпаев оқиға орнында жедел штабпен кеңес өткізді.