АЛМАТЫ, 25 қыркүйек - Sputnik. Қазақстан мұнай өндіруді 2030 жылға қарай жылына 100 миллион тоннаға (шамамен 730 миллион баррель) дейін ұлғайтуға ниетті.
2023 жылы Қазақстанда 90 миллион тонна мұнай өндірілді (655 миллион баррель), ал экспорт 70,5 миллион тонна болды. (517 миллион баррель)
Бұл туралы энергетика министрі Алмасадам Сәтқалиев Алматыда өткен "Энергетикалық жобаларды іске асырудағы халықаралық әріптестік (KIOGE 2024)" конференциясында мәлімдеді. Ол 2023 жылы табиғи газ өндіру көрсеткіші 59,1 миллиард текше метрге жеткенін және 2030 жылға қарай 90,7 миллиард текше метрге жету жоспарланғанын айтты. Сәтқалиев геологиялық барлауға инвестициялар тарту үшін Үкімет жақсартылған үлгілік келісімшарт ұсынып отырғанын атап өтті. Оның мәліметтері бойынша, жалпы инвестиция сомасы 9 миллиард долларды құрайтын 6 келісімшартқа қол қойылған.
"Қазақстан үшін қысқа мерзімді және ұзақ мерзімді ауқымдағы тағы бір басымдық - көмірсутектерді терең өңдеу, атап айтқанда мұнай химиясын дамыту. 2022 жылы біз қуаттылығы жылына 500 мың тонна болатын әлемдегі ең ірі полипропилен өндірістерінің бірін іске қостық. Оның құрылысы халықаралық экологиялық нормалар мен стандарттарға сәйкес орындалды", - деді Алмасадам Сәтқалиев.
Энергетика министрлігінің басшысы айдың басында Қазақстанда қуаттылығы 1,25 миллион тонна және жалпы инвестиция көлемі шамамен 7,4 миллиард АҚШ доллары болатын полиэтилен өндіретін алғашқы зауыттың құрылысы іске қосылғанын айтты.