АСТАНА, 21 қыркүйек – Sputnik. Астанада жыл сайынғы ауыр шаруашылығы жәрмеңкелері басталды. Биыл барлық жәрмеңке көшпенділер ойындары кезіндегі этноауылда өтеді, деп хабарлайды Sputnik Қазақстан қала әкімдігіне сілтеме жасап.
Жәрмеңкелер маусымын Ақтөбе, Атырау және Жамбыл облыстары бастап отыр. Үш өңірдің кәсіпкерлері 125 тонна ет және ет өнімдерін, 250 тонна көкөніс пен жеміс-жидек, 26 тонна сүт өнімдерін, 22 тонна балық, 26 мың дана жұмыртқа, 2 тонна нан-тоқаш өнімдерін және 60 тонна басқа да азық-түлік өнімдерін алып келді. Соның барлығы нарықтағы бағадан 10-15 процентке арзанға сатылады.
Кәсіпкер Әміре Берікжан Жамбыл облысынан иісі мұрын жаратын жеміс әкелді.
"Біз жәрмеңкеге алғаш рет келіп, бақшамыздан алма әкелдік. Жемістеріміз астаналықтарға ұнайды деп үміттенеміз, өйткені алма өте шырынды, дәмді және ұзақ уақыт бойы бұзылмайды", – дейді Берікжан.
Жәрмеңкеге келушілер әрбір облыстың концерттік бағдарламасын да тамашалай алады.
Айта кетері, биыл жәрмеңке "Қазанат" ипподромы артында ашылды. Дәл сол жерде Дүниежүзілік көшпенділер ойындары кезінде үлкен этноауыл болды. Елорда тұрғындары мен қонақтары жәрмеңкеге № 18, 37, 303 және 323 автобустарымен жете алады.