АЛМАТЫ, 17 қыркүйек - Sputnik. Әлеуметтік желілерде әрбір қазақстандыққа әлеуметтік қордан 70 мың теңге төленетіні туралы ақпарат тарады. Еңбек және халықты әлеуметтік қорғау министрлігі бұл жайлы мәлімдеме жасады.
"1949-2010 жылдар аралығында туған Қазақстан азаматтарына әлеуметтік қордан 70 000 теңге аударылатыны туралы әлеуметтік желілер мен мессенджерлерде таратылып жатқан ақпарат шындыққа жанаспайды. Қаражатты аудару үшін белгісіз адамдар сілтемеге өтуді ұсынады", - деп жазды министрлік.
Ведомство әлеуметтік көмектің мұндай түрі жоқ екенін айтты. Тиісінше, хабарламада көрсетілген сілтеме алаяқтар үшін азаматтардың жеке деректерін алу тәсілі болуы мүмкін. Алаяқтармен өзара әрекеттесуді болдырмау үшін сілтемеге өтпеңіздер дейді министрлік.
"Мемлекеттік қолдаудың тиісті шаралары туралы ресми ақпарат тек қана 1414 нөмірінен СМС-хабарламалар арқылы таратылады. Азаматтардан тек ресми көздердегі ақпаратты пайдалануын сұраймыз. Жалған ақпарат тарату заңмен жазаланатынын естеріңізге саламыз", - деп ескертті еңбек және халықты әлеуметтік қорғау министрлігі.