АСТАНА, 13 қыркүйек – Sputnik. Қасым-Жомарт Тоқаев оқу-ағарту министрі Ғани Бейсембаевты қабылдады, деп хабарлады Ақорданың баспасөз қызметі.
Ғани Бейсембаев еліміздегі мектепке дейінгі, орта, техникалық және кәсіптік білім беру салаларын дамыту мақсатында қабылданып жатқан шаралар жөнінде мәлімет берді.
Оның айтуынша, былтыр 137 мың оқушыға арналған 154 жаңа мектеп ашылған. Бұл 29 үшауысымды, 12 апатты мектептің мәселесін шешкен. Жаңа оқу жылында 365 мың оқушыға есептелген 221 білім ошағын пайдалануға беру жоспарланып отыр.
Сонымен қатар мектептерді пәндік кабинеттермен жабдықтау көрсеткіші 2 есе артып, интернеттің сапасы жақсарған. Тәрбие жұмыстары басым бағыттардың бірі болып қала береді. "Адал адам – Адал еңбек – Адал табыс" жалпыұлттық құндылықтарына негізделген "Біртұтас тәрбие" бағдарламасы қолға алынған.
Министр орта білім сапасын арттыру туралы айтты. Айтуынша, мектеп оқулықтары толықтай цифрлық форматқа көшірілген. Қазақстан атынан халықаралық олимпиадаларға қатысқан әрбір екінші оқушы жүлделі орындарға ие болып жүр. Былтыр ел оқушылары 58 алтын медаль жеңіп алған.
Министр техникалық және кәсіптік білім беру жүйесін трансформациялау, инклюзивті және арнайы оқытуды дамыту жөніндегі жобаларды таныстырды.
Мемлекет басшысы оқу-ағарту министріне саланы одан әрі жетілдіру және балалардың қауіпсіздігін қамтамасыз ету бойынша бірқатар тапсырма берді.
Мемлекет басшысы оқу-ағарту министріне саланы одан әрі жетілдіру және балалардың қауіпсіздігін қамтамасыз ету бойынша бірқатар тапсырма берді.