АСТАНА, 25 тамыз – Sputnik. Польша Украинаға көмектесуге өзінің жалпы ішкі өнімінің 3,3%-ын жұмсады – бұл шамамен 100 миллиард злотый (26 миллиард доллардан астам), деп мәлімдеді Польша президенті Анджей Дуда Zero ютуб каналында.
"Біз Украинаға өз мүмкіндігімізге қарай көптеген техника бердік. Украинаға арналған көмек, яғни, әскери және әскери емес, гуманитарлық көмек, бұл жалпы ішкі өнімнің 3,3 пайызын құрайды. Оның ішінде 12 миллиард (3,1 миллиард доллардан астам) әскери көмек", - деді Дуда.
Ол сондай-ақ Украинаға жеткізілген әскери техниканы, оның ішінде танктер, ұшақтар мен броньды машиналарды тізіп шықты.
"Біз Украинаға барлығы 400-ге жуық танк бердік. Т-72, РТ-91 "Twardy", Leopard танктерінен бастап, әртүрлі бронетранспортерлер мен жаяу әскерлер машиналары, өздігінен жүретін "Krab" гаубицалары, қоймаларымызда болған зымыран қондырғылары, МиГ-29 10 ұшағы, 10 тікұшақ секілді мыңға жуық ауыр техника жеткіздік", - деді Польша президенті.
Бұған дейін Польша басшылығы Варшава Украинаға ЖІӨ-ге шаққанда басқа елдерге қарағанда көбірек әскери көмек көрсетті деп мәлімдеген.
Ресей бұған дейін Украинаға қару-жарақ жеткізілуіне байланысты НАТО елдеріне ескерту жіберген. Ресей СІМ басшысы Сергей Лавров Украинаға қару-жарақ жіберген кез келген жүк Ресей үшін заңды нысана болатынын айтты.
Ресей Федерациясының сыртқы саясат ведомствосы НАТО елдері Украинаға қару-жарақ жеткізу арқылы "отпен ойнап отыр" деп мәлімдеді.