АСТАНА, 24 тамыз – Sputnik. "Алтын Қыран-2024" оқу-жаттығуларында Қазақстан мен Әзербайжанның әскери қызметшілері тапсырманы жоғары деңгейде орындады.
Жаттығулардың жаңа күні жаңа тапсырмадан басталды. Құрама жасақтардың командирлері жауынгерлік бұйрықтарды алып, қабылданған шешім туралы басшылық штабына баяндап, барлау тапсырмаларын орындауға кірісті.
Жаттығулардың екінші күнінде де олар жауынгерлік үйлестірудің жоғары деңгейін көрсетті, деп хабарлады қорғаныс министрлігі.
Бірінші жасақты Қазақстан офицері, екіншісін Әзербайжанның өкілі басқарады. Екі елдің әскери қызметкерлерінің де таулы жағдайда барлау жұмыстарын жүргізу тәжірибесі бар.
"Бұл оқу-жаттығуларда біз өз тәжірибемізбен бөлісуді және достас мемлекеттің әскери қызметшілерінің тәжірибесін үйренуді мақсат еттік. Ал бұл офицерлер мен сержанттар бір құрамда иық тіресіп әрекет етіп, бір дастархан басында тамақтанып, бір жауынгерлік тапсырманы орындағанда тиімді болады", - деді оқу-жаттығу жетекшісінің орынбасары полковник Ағзам Берденов.
Таңертең барлаушылар 25 шақырымдық траверске шықты, оның барысында олар жау лагеріне шабуыл жасап, автомобиль техникасы бар колоннаға шабуыл жасап, тауларда жасырынған заңсыз қарулы топтың базалық лагерін іздестірді.